CEBU CITY-Girelibohan ang tulo ka mga pulis sa Mambaling Police Station samtang nagpadayon ang imbestigasyon sa reklamo nga pag-torture sa ilahang dinakpan.
Gipahibalo ni Cebu City Police Office Director, Police Colonel Ireneo Dalogdog, nga kasamtangan una nga gibutang sa City Police Holding Administrative Section (CPHAS) ang nalambigit nga mga pulis.
Katuyoan sa maong lakang kay arun nga dili maapektohan o ma-impluwensyahan ang imbestigasyon nga gipahigayon.
Gidugang pa ni Colonel Dalogdog nga nagpadayon karun ang ilahang pagkuha ug mga ebidensya arun nga musuporta sa pasangil ni Alfredo Engbino batok sa mga naasoy nga pulis.
Kahinumdoman nga miduol si Engbino sa Bombo Radyo Cebu arun nga magpatabang sa iyahang reklamo diin giingong gibunalan ug baseball bat ang iyahang anak nga gidakop sa maong mga pulis, ingon man nga mipasangil nga gikulata usab kini hinungdan nga nangatangtang ang iyahang ngipon.//
Ang sibya-anan kay abli alang sa habig sa gireklamo nga mga pulis.
