PROVINCE OF CEBU-Hugot nga mipahimangno si Cebu Gobernador Gwen Garcia sa DPWH Cebu 5th District Engineering Office (DEO) nga tumanon usab ang kanunay nilang nakalimtan nga obligasyon sa pagkonkreto sa mga barangay road ug dili lang igahin ang pundo sa mga national highway.
Kini ang gibutyag ni Gobernador Garcia ngadto kang DPWH district engineer Florida Nuñez atol sa tigom sa Kapitolyo niadtong Mayo 10, nga base sa RA 6763 nga nag-ingon nga ang “DPWH shall undertake the construction of concrete barangay roads/multipurpose pavements in all barangays throughout the country.”
Ang pahinumdom sa gobernador ngadto sa opisyal sa DPWH usa gyud ka counter-proposal human ang district engineer napakyas pagkuha sa pagtugot sa Kapitolyo sa mga plano sa ahensya sa pag-convert sa labing minos lima ka mga main roads sa Camotes Islands gikan sa Provincial Road status ngadto sa National Roads.
Kini mao ang Poro-Tudela Circumferential Road; Pilar Circumferential Road; San Francisco Circumferential Road; San Francisco Transcentral Road; ug Poro-San Francico Link Road nga adunay kinatibuk-ang gitas-on nga 112.96 kilometros.
Sa higayon nga ang usa ka karsada himoong national road, ang pundo alang sa pagkonkreto niini maggikan sa DPWH, diin ang ahensiya na karon ang nag-una sa pagmentinar ug uban pang mga kalamboan.
