Moabot sa 41 ka mga babaye, lakip ang 10 ka mga menor de edad, ang naluwas sa National Bureau of Investigation-Cebu District Office (NBI-CEBDO) sa dungan nga anti-human trafficking operations sa duha ka managlahing mga lugar sa dakbayan sa Lapu-Lapu.
Lima ka gidudahang mga bugaw ang nadakpan sa mga operatiba sa NBI-CEBDO sa entrapment operations nga gihimo niadtong Sabado, Oktubre 10.
Ang usa ka operasyon gipahigayon sa ahensiya sa usa ka hotel sa Barangay Punta Engaño, diin nasikop ang usa ka alias “Messy” ug naluwas ang 15 ka mga babaye, siyam niini mga menor de edad.
Sa laing operasyon sa usa ka private Villa sa Barangay Pajac, nasikop usab ang usa ka Alias “Boyet” ug tulo ka mga kauban niini.
Sigon sa imbestigasyon sa NBI-CEBDO si Alias Boyet nagpatabang nila ni Jake ug G-Boy sa pagkuha og dugang batan-ong mga babaye samtang si Alias Dodoy maoy gitahasan sa paghatod sa mga babaye sakay sa usa ka van paingon sa pribadong villa.
Gilusad ang mga operasyon human makadawat og kasayuran ang NBI-CEBDO nga dunay pipila ka batan-ong mga babaye ang gitanyag sa giingong mga bugaw sa usa ka online page bugti sa salapi.
Matud sa NBI-CEBDO, base sa ilang imbestigasyon, P5,000 ang bayad alang sa pakighilawas sa matag babaye, P2,000 niini adto mapunta sa bugaw, samtang kon minor ang babaye, P8,000 ang bayad.
Dugang sa buhatan, ipaagi sa pagkomento sa comment section sa usa ka online page, ang pagtanyag og serbisyo sa mga bugaw bugti sa kwarta.
Gidugang pa niini dugay nang kaila sa ubang mga biktima si alyas Messy. Gani, giingong gipananghiran pa ni alyas Messy ang mga ginikanan sa ubang minors nga dad-on ang ilang mga anak sa pool birthday party.
