CENTRAL VISAYAS-Giawhag sa Land Transportation Franchising and Regulatory Board (LTFRB 7) ang tanang mga driver sa motorcycle-for-hire o “habal-habal” nga mulakip sa mga accredited ride-hailing operators arun nga masiguro nga andam kini sila kung ugaling mupatuman ug regulasyon ang gobyerno sa ilahang operasyon.
Gibutyag ni LTFRB 7 Regional Director Eduardo Montealto, Jr. nga gikinahanglan ang regulasyon sa mga habal-habal arun nga masiguro ang ilahang kaluwasan sa kadalanan ilabi na nga nagsakay kini ug pasahero.
Matud pa, ang mga driver niini kay gikinahanglan nga ipaubos sa road safety seminars ug mga examinations, diin gikinahanglan usab kung mulakip sa ride-hailing operator.
Gidugang pa ni Montealto nga sa maong pamaagi kay ma-regulate usab ang pletehan sa mga pasahero gumikan kay nabantayan nga mahal ang pangayo nga plete sa mga habal-habal.
Gipasabot niini nga sa maong lakang, mas protektado ang mga pasahero gumikan kay ang tanan nga pagbyahe kay nakatala ug masubay kung ugaling adunay mga panghitabo nga dili maayo.
