MANDAUE CITY, CEBU-Gitino ni Hyll Retuya, ang in-charge sa Traffic Enforcement Agency of Mandaue (TEAM) nga nagpadayon ang buhatan sa pagpalit og mga speed gun ug sa pag-abot niini hugot nga ipatuman ang speed limit ordinance sa dakbayan ug pahamtangan og silot ang mga mo-overspeed nga motorista.
Kini nga pamahayag subay sa nahitabung disgrasya sa Ouano Avenue, North Reclamation Area sa Barangay Subangdaku, Mandaue City, Cebu, sa nakalabay nga adlaw.
Hinungdan nga nipahinumdoman kini sa mga drayber nga mag-amping kanunay, arun luwas sa pagmaneho, ug magmapailobon.
Sa pikas bahin, gitino ni Assistant investigator Police Master Sergeant Melvin Leones sa Traffic Enforcement Unit nga ang insidente nahitabo mga alas 9 sa buntag niadtong Sabado.
Matod niya nga ang biktima nga giilang si Julieto Gasper Jr., 26, taga Cordova, padulong unta sa trabaho sa dakbayan sa Sugbo ug nagdali kini kay aduna siya’y gitambongan nga tigom dihang wala niya makita ang trak sa atbang nga direksyon.
Nakaangkon og grabeng samad sa iyang abaga ang biktima ug daling gidala sa Mandaue City Hospital aron matambalan apan gideklarar kini nga dead on arrival.
