MANDAUE CITY, CEBU-Gikatakdang mosumite ang Mandaue City College (MCC) sa ilang re-application alang sa Certificate of Program Compliance (COPC) ngadto sa Commission on Higher Education (CHED-7) sa Central Visayas karong semanaha.
Gibutyag ni MCC Administrator Dr. Lilybeth Mayol nga ila nang gi-scan ang mga dokumento nga gikinahanglang isumite sa CHED karong semanaha ang COPC gikinahanglan para sa Unified Student Financial Assistance System for Tertiary Education (UniFAST) sa CHED alang sa libreng tuition.
Ang COPC usa ka pag-ila nga ang mga partikular nga degree programs nga gitanyag sa mga lokal nga unibersidad ug kolehiyo hingpit nga nagsunod sa sumbanan ug mga giya sa CHED. Aron masiguro nga ang mga programa nga gitanyag sigurado nga kalidad.
Kahinumduman nga gihatagan sa CHED og hangtod Hunyo 30 ang Mandaue City College aron maka-apply og balik sa COPC aron makatanyag na usab og libreng tuition.
Niadtong 2022, gi-delist sa CHED ang Mandaue City College ug ubang lokal nga unibersidad ug kolehiyo tungod sa kapakyas sa pagtuman sa mga rekisitos ubos sa Republic Act 10931 o ang “Universal Access to Quality Tertiary Education Act.”
Natala ang una nga aplikasyon sa MCC alang sa UniFAST kaniadtong 2019 sa dihang gihatagan kini nga libre nga programa sa tuition kung diin ang tuition sa tunghaan mokabat sa P5,000 matag semester.
