LILOAN CEBU-Gikustodiya na karun sa kapulisan ang usa ka call center agent human nga nakabangga ug tulo ka mga motorsiklo ug usa ka jeep de pasahero-an.
Si Leah Lou Radaza, 42-anyos, ang gi-hold karun sa Liloan Police Station, samtang gikatakda nga pasakaan ug kaso.
Basi sa imbestigasyon, gisaysay ni Patrolman Jicliff Guilaran, ang imbestigador sa Liloan Police Station, nga gikan pa sa night shift ang maong call center agent hinungdan nga hilabihan ang ka-kapoy ug ka-duka niini, diin miresulta sa usa ka disgrasya.
Matud pa, ang sakyanan nga gimaneho ni Radaza kay midaro sa usa ka nag-parking nga passenger jeepney, tulo ka motorsiklo, lamppost ug carenderia.
Pipila sa mga naangol kay nagkaon sa ilahang pamahaw sa carenderia, kung diin nakatala usab ug pagkaguba sa mga bangko ug lamisa.
Ang mga biktima nga nalandig sa Danao City District Hospital kay giila nga sila si Cynthia Isok, 40 anyos, taga Barangay Casili, Consolacion; Pernleo Okasmier, 7 anyos, taga Barangay Casili; Analyn Tagalog, 45 anyos, taga Barangay Jubay; Emaluna Orque, 36 anyos, taga Sitio Fatima, Barangay Jubay; ug Allan Tacumba, 42 anyos, taga Compostela town.
Mag-atubang si Radaza ug kasong reckless imprudence resulting to multiple physical injuries and damage to property.
