CENTRAL VISAYAS-Mihatag ug suporta ang mga local tourism stakeholders ug mga industry leaders sa pinakabag-ong slogan nga “Love the Philippines” human sa kontrobersyal nga ad campaign niini sa Department of Tourism (DOT).
Mipadayag sa ilahang pagsalig sa liderato ni Tourism Secretary Christina Frasco ang Hotel, Resort and Restaurant Association of Cebu Inc. (HRRACI), Mandaue City Chamber of Commerce and Industry (MCCI), ug Cebu Chamber of Commerce and Industry (CCCI), ingon man sa pag-rebrand sa kalihim sa turismo sa nasud.
Mipadangat usab sa ilahang suporta ang Cebu Mandaue Filipino Chinese Chamber of Commerce and Industries (CMFCCCI) ug Cebu Filipino Chinese Chamber of Commerce and Industry (CFCCCI) sailahang suporta ngadto kang Frasco.
Kapin sa 63 ka mga opisyal sa turismo tibuok lungsod ug syudad sa Sugbo ang nagpaluyo kang Frasco samtang pipila ka mga magbabalaud ang mipadayag ug nagkadaiyang reaksyon sa kontrobersiya nga mitumaw human nga gilusad sa DOT ang bag-ong slogan niadtong Hunyo 27, 2023 pinaagi sa audio- visual presentation nga adunay stock video sa mga maanindot nga talan-awon nga dili kinuha gikan sa nasud.
Giawhag nila ang publiko nga maghi-usa sa pagsuporta sa labing bag-ong kampanya sa DOT gumikan kay gipasiugda niini ang nasud isip usa ka nag-unang destinasyon sa mga turista.
Giawhag usab nila ang publiko nga suportahan si Frasco kay nagtuo sila nga ubos sa pamunoan niini kay padayon nga mulambo ang turismo sa nasud.
