CONSOLACION, CEBU-Padayong gipangita ang usa ka lalaki nga gipasanginlan nga nidunggab patay sa iyang live-in partner sulod sa balay sa ilang amo sa lungsod sa Consolacion niadtong Dominggo, Hulyo 16, 2023.
Gikompirmar sa kapolisan sa Consolacion nga nakadawat sila og impormasyon gikan sa usa ka concerned citizen nga adunay nahitabong pagpanunggab sa usa ka residential area sa Brgy. Casili mga alas 8:30 sa gabii.
Ang mga imbestigador niabot sa balay sa usa ka Asuncion Locoson, 72, diin ilang nakit-an ang usa ka babaye nga wala nay kinabuhi nga adunay daghang mga samad dinunggaban sa atubangan nga nataran.
Giila ang biktima nga si Perlita Cabanes, 37, nagtrabaho isip katabang ni Locoson.
Matod ni Locoson, diha siya sa sulod sa ilang balay dihang iyang namatikdan ang live-in partner ni Cabanes nga giilang si Bernabe Biasca, nga nagbarog sa iyang atubangan nga nagbitbit og kutsilyo nga nabulit sa dugo.
Tungod sa pagkaalarma, si Locoson midagan dayon sa gawas apan nakaaghat kini kang Biasca sa pagpalayo sa dapit.
Didto, iyang nakit-an si Cabanes nga nagbuy-od sa yuta, naligo sa kaugalingon niyang dugo.
Hinungdan nga nanawag dayon kini og tabang sa iyang mga silingan aron ipadala si Cabanes sa duol nga ospital.
Apan sa ulahi, gideklarar siya sa mga nag-atiman nga doktor nga dead on arrival.
Kasamtangang nagpahigayon og hot pursuit operation ang kapolisan batok kang Biasca hangtod ning pagsuwat.
