TALISAY CITY-Nasakmit sa mga kapulisan ang kapin sa lima ka kilong Shabu nga nagkantidad og P27 milyon atol sa ilang gilusad nga buy-bust operation sa Purok Kawayan, Sitio Kimba, Barangay San Roque sa Dakbayan sa Talisay pasado alas 10 sa gabii sa Hulyo 30.
Ang suspetsado nga nadakpan giila nga si Robert Bonghanoy Fernan, 31-anyos, kinsang nanag iya og junkshop nga taga Purok Avocado, Brgy. Maghaway, sa naasoy nga lungsod.
Basi sa imbestigasyon, nasuta nga dili pa kini unang higayon nga naglambigit si Fernan sa iligal nga drogas gani nadakpan na kini niadtong tuig 2017 ug nakagawas gumikan sa susama gihapon nga kaso.
Nasayran nga ang suspect lakip sa lista sa Provincial High Value Individual sa Philippine National Police (PNP).
Pipila sa nasakmit gikan kaniya ang unom ka paper bag nga adunay sulod nga dagkong pinutos sa gituohang shabu nga motimbang sa 5.5 kilos nga dunay standard drug price nga P37,400,000 ug usa ka kalibre 45 nga pistola ug mga bala niini.
