CEBU CITY-Gisugdan na sa mga kagamhanan sa syudad sa Sugbo ang pagpangandam alang sa pag-host niini sa Palarong Pambansa sunod tuig.
Mao kini ang gibutyag sa pango sa Department of Education (DEPED)-Central Visayas nga Dr. Salustiano Jimenez atol sa iyahang pakighinabi sa Bombo Radyo Cebu.
Sumala ni Jimenez nga gani bisan wala pa opisyal nga gi-anunsyo nga ang ang Dakbayan mao ang mag-host sa Palarong Pambansa 2024, nagsugod na kini sa pagpangandam sama nalang sa pagsirado sa Abellana Sports Complex alang sa pag-renovate sa swimming pool ug oval niini ingon man ang pag-identify ug pag-lista sa mga posibli nga playing venues ug headquarters.
Magpahigayon usab og organizational meeting si Jimenez kauban si Cebu City Mayor Mike Rama ug uban pa nga mga opisyales ingon man stakeholders isip preparasyon sa umaabot nga Palarong Pambansa sunod tuig.
Gidugang sa opisyal nga dako og tabang ang resolusyon gikan sa Regional Development Council (RDC) sa pag bid sa Cebu City sa pag-host sa naasoy nga sports event ug sumala pa, nga ang malamposon nga bidding sa Dakbayan kay tungod sa hiniusang paglimbasog dili lang sa lokal na kagamhanan kung dili sa kinatibuk-an sa Central Visayas.
Samtang, ang ulahing pag-host sa Cebu City sa nahisgutang sports event kay kaniadto pang tuig 1994, kung diin ang Abellana Sports Complex mao ang nahimong main venue.
