CEBU CITY-Labing minos upat ka mga drug suspect ang samdan human kini nakigpinusilay sa kapulisan sa Balamban niadtong Sabado sa gabii.
Nahitabo ang insidente atol sa gipahigayong buy-bust operation sa mga operatiba sa Drug Enforcement Unit sa Balamban Police Station sa Barangay Pondol.
Ang hepe sa Balamban Police Station, Police Lt. Col. Glenn Hife, niingon nga dihang namatikdan sa subject nga giilang si Richard Moscoso alyas Harry nga nakigtransaksyon kini sa usa ka polis dali kining misakay sa kolor gray nga Mitsubishi Mirage G4 nga may plakang Y2D754.
Misibat si Moscoso hinungdan sa paggukod nga nakaabot sa Barangay Cambuhawe sa maong lungsod.//
Nasayran sa ulahi nga ang sakyanan gimaneho ni Arianne Blaire Navales.
Gawas ni Moscoso adunay laing mga pasahero nga sakay sa sakyanan, nga sila si Rex Ledesma, Rhea Abegail Genovesa, ug duha ka 15-anyos nga mga bata.
Pag-abot nila sa Barangay Cambuhawe, gibabagan ang sakyanan sa patrol car sa kapolisan.
Gimandoan ang mga suspek sa pag-surrender apan gimaniobra hinuon sa drayber ang motorsiklo nga gigamit sa usa sa mga operatiba sa kapulisan.
Nahitabo ang pinusilay human gikatahong nakigpinusilay si Moscoso sa mga polis.
Nanaug si Moscoso sa sakyanan human kini mi-overover sa karsada ug misuway sa pag-ikyas apan na-neutralize dayon siya ug nasikop sa kapulisan.
Daling gisusi sa kapolisan ang sakyanan ug nakit-an ang samdan nga mga pasahero sa sulod nga si Ledesma, Navales, ug usa sa duha ka menor de edad.
Dali silang gidala sa Balamban Provincial Hospital aron matambalan.
