CEBU CITY-Nagtingkagol na sa prisohan ang usa ka taxi driver human nga midangop ang usa ka medical-technology student sa buhatan sa Abellana Police Station.
Matud pa ni Police Captain Mark Don Alfred Leanza, hepe sa Abellana Police Station, gi-aksyunan ang maong pagsikop sa suspek human nga mireklamo ang 23-anyos nga biktima diin miingon nga gihinulan kini sa iyahang nasakyan nga taxi drayber.
Giila sa mga kapulisan ang suspek nga si Jose Jenkie Retuerto Engco, 47-anyos, minyo, ug lumulupyo sa Sitio All Season 3, Barangay Cogon Pardo, dakbayan sa Sugbo.
Giangkon sa biktima ngadto sa mga kapulisan nga gihikap ang batiis ug dayon hinayhinay nga gipagawas ang kinatawo sa lalaki samtang nag-andar ang sakyanan.
Base sa gipahigayon nga imbistigasyon sa mga kapulisan, nga adunay kasabutan ang nahitabo sulod sa taxi, ug ingon man nga gitugutan si Engco nga mohikap ngadto sa biktima hilabi na nga kuwangan ang kwarta nga ipliti sa maong babaye.
Sa pakighinabi sa Bombo Radyo Cebu News Team sa suspek, giangkon niini ang akusayon apan hugot niining gibarugan ang pagtuo nga gitugutan kini sa babaye.
Subay sa maong balita, nanghinaot gihapon si Engco nga dili na mopasaka ang biktima og kaso batok kaniya ingon man nga nangayo sab kini og pasaylo.
Sa pagkakaron, nag-atubang na ang suspetsado sa kasong acts of lasciviousness.
