CEBU CITY-Girespondehan sa mga kabumberohan ang usa ka sunog nga miigo sa usa ka residential building sa Barangay Tejero, Dakbayan sa Sugbo pasado alas 2 sa hapon kagahapong adlawa, Setyembre 9.
Mikatkat sa ikaduhang alarma ang maong sunog, hinungdan nga miresponde usab ang ubang mga haduol nga estasyon.
Mikabat ngadto sa P2.4 million ang nahimong danyos sa maong sunog, kung diin 15 ka balay ang apektado, unom ang partially burned, siyam ang totally burned, samtang 15 ka pamilya o 60 ka mga indibidwal ang apektado.
Samtang, wala pa masuta ang rason sa maong sunog.
Sa pikas bahin, laing sunog ang girespondehan sa mga kabumberohan pasado alas 8 sa susamang adlaw.
Nasayran nga mikatkat ngadto sa ikatulong alarma ang maong sunog nga partikular nga miigo sa Sitio Laurente U. Aviola, sa susamang barangay.
Dugang pa nga mikabat ngadto sa P4.2 million ang nahimong danyos sa maong sunog samtang walay natala nga casualty.
Sa kinatibuk-an, 20 ka mga balay ang apektado, kung diin 14 niini ang totally burned ug 6 niini ang partially burned.
Subay sa maong balita, ang kainit sa panahon ug problemang elektrikal ang gilantaw nga posibling hinungdan sa nahitabong dagkong sunog sa dakbayan.
