CEBU CITY-Milingkod sa katungdanan ang bag-ong hepe sa Balamban Municipal Police Station nga si Police Lieutenant Colonel Joey Bicoy, kinsa kanhi pangulo sa City Intelligence Unit sa Lapu-Lapu City Police Office.
Gipulihan ni Bicoy si Police Lieutenant Colonel Glenn Hife kinsa karun ang kasamtangan nga pangulo sa Provincial Police Strategy Management Unit.
Sigon pa ni Police Colonel Percival Zorilla, hepe sa Cebu Police Provincial Office ang rason ngano gi-relibohan si Hife aron hatagan og higayon nga mosaka ang posisyon niini sa pag-serbisyo nga gibutang sa lain nga unit.
Kahinumduman nga si Hife nahimo nga hepe sa naasoy nga lugar sulod sa 16 ka buwan ug daghan na og mga accomplishment.
Apan, kahinumduman nga adunay kontrobersiya ang nagpalibot sa iyahang pwesto gumikan sa nahitabo nga pagpamusil patay sa usa ka kandidato nga modagan unta pagka-kapitan sa Barangay Cansomoroy nga si Anastacio Pacquiao samtang nisakay sa iyahang motor sa Barangay Prenza.
Sa laing bahin, gitataw sa bag-ong hepe sa Balamban nga iyahang ipadayun ang mga nasugdan na nga programa ni Hife hilabi na sa kampanya batok sa illegal nga drugas.
