CEBU CITY-Patay ang usa ka drayber sa motorsiklo samtang naa sa kritikal nga sitwasyon ang usa ka driver sa usa ka Ford Expedition nga mibangga sa usa ka motorsiklo, auto ug duha ka bisikleta sa Pope John Paul II Avenue, Barangay Mabolo sa dakbayan sa Sugbo pasado alas 6:00 sa Sabado sa buntag, Nobyembre 11, 2023.
Giila ang driver sa motorsiklo nga si Jomarie Bernas nga taga Bo. Luz sa dakbayan sa Sugbo, kinsa patay human madaro sa naghaguros nga auto nga gimaneho ni Jaehyun Lee, usa ka Korean National nga taga Beverly Hills, Lahug, Cebu City apan kasamtangan nga nag puyo na karon sa dakbayan sa Mandaue.
Sa imbestigasyon sa kapulisan nasuta nga nag subay sa Pope John Paul II Avenue ang Korean National nga gituohang hubog apan pag abot sa usa ka gasoline station duol sa Carmelite Seminary iyang nadumbolan ang Toyota Vios nga gi maneho ni Marc Dominic Rama Arante.
Mokanaog unta si Arante aron iyang ikompronta ang nakabangga niya apan mipasutoy na hinuon kini sa pagpadagan nga mi resulta na usab sa pagkabangga sa laing auto nga gimaneho ni Erwin Leonardo Conson.
Tungod sa kakusog sa dagan iyang nadumbol ug nadaro ang usa ka motorsiklo nga gimaneho ni Jomarie Bernas nga mi resulta sa kamatayon niini.
Apan inay mohunong midiretso pa kini sa pagpadagan ug iya na usab nga na igo ang tulo nga nag bisikleta nga silang John Rin Lindra ug Adrian Seguera.
Tungod sa padayong kakusog sa dagan niini nawad-an na usab og control ang driver ug didto siya mibangga sa usa ka kongkretong koral ug sa poste sa Visayan Electric nga maoy hinungdan nga mibalitok ang gimanehong sakyanan.
Dali nga nangabot ang rescue team sa Cebu City Disaster Risk Reduction and Management Office ug gidala ang driver sa labing duol nga tambalanan nga gihulagway nga talandugon ang kahimtang.
Kasong Reckless Imprudence Resulting in Homicide ug Multiple Serious Physical Injuries ang giandam sa Mabolo police station.
