LAPU-LPU CITY-Nagpositibo ang duha ka empleyado sa Lapu-Lapu City Hospital sa paggamit og ilegal nga drugas atol sa gipahigayong kinalit nga drug test niadtong adlaw nga Biyernes.
Sa kapin gatusan ka mga trabahante sa maong lungsod, duha niini ang napkyas ug giingong nameligro nga matangtang sa serbisyo sa gobyerno.
Gibutyag ni Garry Lao, executive director of the City of Lapu-Lapu Office for Substance Abuse Prevention nga dili pa kini makapagawas og detalye kabahin sa mga naasoy nga empleyado gumikan susihon pa niini ang kahimtang ig balik sa trabaho karong adlawa.
Ingon man ang pagsuta sa departamento sa city hospital diin kini sila nadestino.
Miabot sa 108 ka mga staff sa tambalanan diin pinangulohan ni Dr. Deborah Ann Custodio, ang gipa-submit sa ilang urine sample niadtong Biyernes alang sa drug testing.
Subay kini sa mandatory ug kinalit nga drug test sa Executive Order nga gipirmahan ni Lapu-Lapu City Mayor Junard Chan nga nagmando sa promosyon sa drug-free workplace.
Ingon man nga mibahala na si Lao kang Mayor Chan sa dangatan sa duha ka kawani kinsang anaa sa tambalanan.
Hinuon matud ni Chan nga mahatagan sila og kahigayonan nga maka-reporma ug maka-apply pagbalik sa Lapu-Lapu City Hall human sila mopaubos sa drug rehabilitation nga sugdan sa CLOSAP.
