CEBU CITY-Nasikop ang 72-anyos nga lalaki atol sa gipahigayon nga buy-bust operation sa Inayawan Police Station sa Sitio Sto. Niño Community, Barangay Kinasang-an dakbayan sa Sugbo.
Giila ang suspetsado nga si Lydio Pantoniel nga lumulopyo sa naasoy nga dapit.
Nakuha sa mga operatiba sa Station Drug Enforcement Team sa Inayawan Police station ang mga pakete sa gituohang shabu nga motimbang sa 6.12 gramos nga nagkantidad og P41,616.
Gani, wala gikalimod ni Pantoniel nga mogamit kini sa ginadiling drogas ug matud pa niini nga tambal niya kini sa iyang hubak.
Dugang pa nga kung gani makakondisyon kini sa maong butang, mogaan ang iyang pamatai.
Sa pikas bahin, sikop ang duha ka mga drug suspect atol sa buy-bust operation sa sitio Rafael, Barangay Tangke, Talisay City, Cebu.
Giila ang mga nadakpan nga sila si Egie Abenes Relampagos ug Randy Mabala Daan kinsang mga nakuhaan og 600 gramos o gibana-banang kapin sa P4 milyones nga balor sa iligal nga drugas ug armas ang nakuha sa Drug Enforcement Unit sa Talisay City Police Station.
