CENTRAL VISAYAS-Nasikop ang gidudahang high-value individual sa Purok 5, Barangay Libaong, lungsod sa Panglao, Bohol atol sa gipahigayon nga buy-bust operation sa gahapong adlawa Pebrero 27, 2024.
Naila ang suspek sa alyas nga ‘JR’, 41-anyos nga taga Barangay Sagnap sa lungsod sa Loay, Bohol.
Gani, ang malampuson nga anti-illegal drug operation, nga gihimo sa mga operatiba sa Panglao Police Station ubos sa direktiba ni Police Captain John Khaley Diel Sanchez ug sa pakigtambayayong sa Philippine Drugs Enforcement Agency Bohol Provincial Office, nakuha sa suspek ang 1,050 gramos nga gituohang shabu, nga adunay kantidad nga P7,143,000.
Base sa giluwat nga pamahayag ni Police Lieutenant Colonel Norman Nuez, ang information officer sa Bohol Police Provincial Office, nga ang mga narcotics nga anaa kang JR, gikan sa usa ka piniriso sa Abuyog Penal Colony sa Leyte.
