CENTRAL VISAYAS-Nakaagom og makagun-ob nga mga kapildihan ang CPP-NPA sa tibuok buwan sa Pebrero, samtang ang Visayas Command (VISCOM) nagbanlas sa tibuok rehiyon sa Kabisay-an sa mga paningkamot niini sa pag-neutralize sa mga salin sa teroristang grupo.
Kung diin, nakahimo ug 21 ka armadong engkwentro ang duha ka joint task forces sa VISCOM, ang Joint Task Force Spear ug Joint Task Storm uban sa suporta sa ilang component units, Naval Forces Central sa Phil. Navy ug Tactical Operations Wing Central sa Phil. Air Force batok sa CPP-NPA sa tibuok Visayas region.
Misangpot kini sa pag-neutralize sa 30 ka teroristang NPA, kung diin ang 14 niini ang namatay atol sa engkwentro, 15 ang nibalik sa toril sa balaod, ug usa ang nadakpan.
Sa susamang panahon nakuha usab ang anaa sa 47 ka mga armas kung diin ang 34 niini high-powered.
Subay niini, si Lieutenant General Benedict M Arevalo PA, ang Commander sa VISCOM nihatag og gibug-aton nga taliwala sa dagkong mga kadaugan nga ilang nakab-ot karong buwana, wala pa mahuman ang ilang misyon.
Gitumbok niini nga mahimong nakab-ot na na ang dagkong mga kadaugan sa ilahang kampanya karong buwana apan daghan pa ang kinahanglan buhaton.
Hinungdan nga nakatutok karon ang pwersa sa kasundaluhan sa pagpugong sa pagbangon sa CPP-NPA sa Kabisay-an pinaagi sa pag-neutralize sa pipila ka nahibiling sakop sa teroristang grupo.
Dugang pa, nga sa 30 ka mga teroristang NPA nga na-neutralize, tulo niini mga high-value personalities, nga giilang sila si Rolando Caballera aka Chow/Brooks, miyembro sa Regional Executive Committee sa NPA sa Eastern Visayas nga namatay atol sa engkwentro sa Albuera, Leyte niadtong Pebrero 10.
Ingun man si Domingo Compoc aka Cobra/Silong, ang pinakataas nga lider sa NPA sa Bohol nga namatay atol sa engkwentro sa Bilar, Bohol niadtong Pebrero 23; ug ang pinakabag-o, si Rena Rhea Camariosa aka Kira/Sheena, ang 2nd Deputy Secretary sa Southern Panay Front sa NPA, kinsa gibiyaan nga namatay sa iyang mga kauban human sa engkwentro sa pwersa sa gobyerno sa San Joaquin, Iloilo.
