CEBU CITY-Gipasabut ni Vice Mayor Raymond Alvin Garcia isip head sa Cultural and Historical Affairs Commission (CHAC), ang rason kung nganung karun pa gipahunong ang proyekto sa Cebu Bus Rapid Transit (CBRT) ilabi na sa usa ka bahin sa Osmeña Boulevard atubangan sa Capitol building, alang sa heritage preservation.
Matud sa Bise Mayor, nga kana gumikan kay karun pa usab nila makita ang disenyo sa naasoy nga proyekto ug ilahang nakita nga ang pagtukod sa CBRT’s bus station atubangan mismo sa Capitol building, matawag kini og “photobomber in the making.
Hinungadan nga ang Cebu City Council niawhag sa City’s Office of the Building Official (OBO) sa pagluwat og cease and desist order batok sa pagtukod sa CBRT’s bus station atubangan mismo sa Capitol building.
Ang kamandoan, matud sa konseho, kinahanglan nga magpabilin nga epektibo hangtod ug gawas kung ang usa ka mas maayo nga alternatibo nga disenyo isumite sa National Commission on Culture and Arts, Cultural and Historical Affairs Commission (CHAC), ug sa Konseho mismo.
Sa pikas bahin, gitino sa opisyal nga walay kausaban sa politika, magpabilin sila nga ka-partido ni Cebu City Mayor Michael Rama.
Kini ang diretso nga tubag sa Bise Mayor sa dihang eksklusibo nga nahinabi sa 𝐁𝐨𝐦𝐛𝐨 𝐑𝐚𝐝𝐲𝐨 𝐂𝐞𝐛𝐮.
Matud pa sa Bise Mayor nga kining tanan, usa lamang ka ‘professional in nature’.
Giingong mamahimong adunay kaugalingong ideya ang mayor, samtang siya aduna usa’y kaugalingong ideya isip nagdumala sa usa ka independent council.
Gitino ni Garcia nga wala niini gibirahan si Mayor Rama, inay ang istasyon sa Cebu Bus Rapid Transit.
Kahinumdoman nga pipila ka mga pamahayag ang giluwatan ni Mayor Rama direkta ngadto kang Vice Mayor Garcia subay sa paghi-uyon sa bise mayor sa pagpahunong sa konstruksyon sa CBRT atubangan sa Cebu Provincial Capitol.
