CEBU CITY-Personal nga gisusi ni LTFRB 7 Regional Director Eduardo Montealto Jr., ang Cebu South Bus Terminal karung adlawa, Miyerkules Santo, arun nga arun masiguro nga luwas ba nga sakyan ang mga bus nga mag-byahe paingon sa South nga bahin.
Lakip sa gisusi niini ang mga ligid sa mga bus, brake, dash cameras, CCTV cameras ug ang mga naglukat og special permit.
Gibutyag ni Montealto nga mokabat sa 176 ka mga buses ang nahatagan og special permit gikan sa ilahang buhatan.
Mipahinumdom ang opisyal nga magamit lang ang special permit sugod niadtong Marso 22 hangtud sa Abril 14 ning kasamtangan nga tuig.
Kini arun sa pag-accomodate sa mga pasahero nga manguli sa ilahang tagsa-tagsa ka mga probinsiya sa umaabot nga long holiday subay sa obserbasyon sa Semana Santa, ingon man sa ilahang pagbalik usab sa dakbayan pagkahuman sa holiday.
