PROVINCE OF CEBU-Nipresentar ang mga project implementers sa Cebu Bus Rapid Transit project atubangan sa mga opisyal sa Cebu Provincial Government sa disenyo sa duha ka bus terminals nga tukoron sa Osmeña Boulevard, atubangan mismo sa Capitol Building.
Apan, si Gobernador Gwendolyn Garcia, Bise Gobernador Hilario Davide III, ug ang 17 ka mga sakop sa Provincial Board nipadayag sa ilang hugot nga pagsupak sa disenyo sa mga bus terminal nga makita nga negatibong makaapekto sa visual ug cultural integrity sa Capitol Building diin usa ka importante nga heritage structure ug cultural treasure nga gipanalipdan sa balaod.
Sa maong panagtigom, si CBRT project manager Engr. Norvin Imbong niingon nga bisan paman nga nakasabot kini sa pagsupak sa Kapitolyo sa desinyo, ang pag-usab niini dili iya kon dili ang labaw nga tagdumala sa Department of Transportation nga mao’y lead agency sa pagpatuman sa maong proyekto.
Ingon man nga madasigon si Gobernador Gwen nga ang DOTr, ilabi na sa pagbisita ni DOTr Sec. Jaime Bautista, nga painawon niini ang sentimento sa Kapitolyo sa maong butang.
Subay niini, nabalaka usab ang mga opisyal sa Kapitolyo sa posibleng mosangpot pa sa grabe nga epekto sa CBRT bus stations sa Osmeña Blvd sa kahuot sa trapiko.
Gibutyag ni Imbong nga lakip sa CBRT project mao ang pagpanindot sa sidewalk sa Osmeña Blvd, gikan sa Kapitolyo paubos sa Fuente Rotunda.
Gikatakda usab nila nga pauswagon ang sidewalk pinaagi sa pagpugong sa gutter ug pagbutang og mga suga sa kadalanan, paving blocks, ug planting strips aron makamugna og mas nindot ug pedestrian-friendly nga palibot.
Hinungdan nga gilaoman nga i-duso sa mga Board Members ang usa ka resolusyon sa hunta probinsyal nga nagpakita og suporta sa himuong sidewalk beautification ug ang pag preserbar sa cultural heritage sa kapitolyo.
