PROVINCE OF CEBU-Miluwat ug municipal-wide curfew ang gamhanang lokal sa lungsod sa Liloan epektibo dayon sugod kagahapon, Mayo 10, 2024.
Kini human sa nahitabong pagpamusil sa atubangan sa usa ka convenience store sa Brgy Yati sa naasoy nga lungsod niadtong kadlawn sa Mayo 9, 2024.
Kung diin matud pa sa imbestigasyon sa kapulisan nga “Gang war” ang migawas nga hinungdan sa kagubot, nga mikutlo ug kinabuhi sa usa ka babaye ug nakaangol ug duha pa ka lain nga biktima nga giingon miyembro sa “CRIPS” gang.
Tungod niini, nagpahigayon ug panagtagbo sila si Liloan Mayor Aljew Frasco uban sa pipila ka mga opisyales ug sa mga kapulisan sa maong lungsod aron pagdeklarar sa ipahigayong municipal-wide curfew nga magsugod sa alas 10 sa gabii hangtud alas 4 sa kadlawn.
Gipahimangnuan sa alkade ang mga ginikanan nga pagmonitor sa ilang mga menor de edad nga mga anak aron sa ilang kaluwasan ug seguridad.
Sa pikas bahin, kasamtangang anaa na sa kustodiya sa kapulisan ang upat sa lima ka suspek sa maong krimen og nagpadayon pa sa pagpangita sa katapusang suspek.
