Gibanabana nga 21,000 ka ektarya sa mga pananom sa Calabarzon, Bicol, ug Eastern Visayas ang nadaot sa bagyong Aghon diin kadaghanan niini mga humayan.
Gibutyag ni Agriculture Assistant Secretary for field operations U-Nichols Manalo, nga nagpadayon pa ang validation sa mga field offices sa Department of Agriculture (DA), busa gilauman nga mosaka pa ang ihap sa nadaot nga mga pananom.
Gipasalig ni Asec. Manalo nga adunay nakaandam nga tabang alang sa mga apektadong mag-uuma, sama sa mga liso ug uban pang kagamitan sa pagpanguma.
Masaligon usab ang opisyal nga dili dako ang epekto sa mga danyos sa suplay sa bugas tungod kay daghang mga lugar sa nasud ang nakaani na og humay.
Dugang pa ni Manalo nga gihipos na daan sa mga storage facility ang mga butang sa pagpanguma aron masiguro nga adunay igong suplay sa panahon sa kalamidad.
