Ni-resign si Cebu Governor Gwendolyn Garcia sa Partido Demokratiko Pilipino – Lakas Ng Bayan (PDP-Laban) kagahapong adlawa, Martes, Mayo 28 2024.
Mipahibalo si Garcia nga iyang gisumiter ang iyang resignation letter ngadto sa pangu sa Partido nga si Rep. Jose Alvarez sa 2nd District sa Palawan.
Epektibo dayon ang resignation sa gobernador ingon man gihatagan usab ang mga kopya sa suwat ngadto sa partido ug mga sakop sa media.
Ang PDP-Laban mao ang kanhi nagharing partido sa nasod nga gipangulohan ni kanhi Presidente Rodrigo Duterte.
Sa iyang sulat, gitumbok ni Garcia ang mga kalainan sa politika ug panagbangi sa mga kasamtangang miyembro sa PDP-Laban dinhi nga maoy hinungdan sa iyang desisyon nga mobiya sa grupo.
Labi na, ang panagbikil tali nila ni suspended Cebu City Mayor Michael Rama.
Bisan pa sa resignasyon, si Garcia, kinsa unang nahimong miyembro sa PDP-Laban sa 2019 Midterm Elections, nagpasalamat sa partido.
