Gikompirmar sa Philippine Institute of Volcanology and Seismology (Phivolcs) sa Central Visayas nga nagpabiling luwas ang lalawigan sa isla gikan sa ash fall, sulfur dioxide flux ug uban pang epekto sa pagbuto sa bulkan.
Ang kasamtangang agianan sa hangin nagsugyot nga ang abo nga gibuga gikan sa Kanlaon, human sa iyang phreatic o steam-driven eruption niadtong Lunes sa gabii, dili makaabot sa Sugbo, matod sa Phivolcs-7 director, Robinson Jiorgio, niadtong Martes, Hunyo 4.
Bisan pa, iyang gitambagan ang publiko nga magpabiling mabinantayon, labi na sa mga residente duol sa Kanlaon tungod kay ang Alert Level 2 nagpabilin nga epektibo sa Lunes.
Base sa gikataho sa mga awtoridad, posibleng mahitabo ang ashfall sa pipila ka mga lugar sa Negros Occidental ug Negros Oriental.
Kini naglakip sa kasadpang bahin sa Canlaon City sa Negros Oriental ingon man sa mga lokalidad sa La Castellana, La Carlota, Pontevedra, Valladolid, San Enrique, Hinigaran, Binalbagan, ug sa habagatan-sidlakang bahin sa Bago City.
Ang Kanlaon, usa ka aktibong bulkan ug ang ikaduhang pinakataas nga summit sa nasod, mibuto ug mibuga ug baga, abuhon nga abo nga panganod nga moabot hangtod sa lima ka kilometro.
Matod pa ni Jiorgio, giklasipikar sa Phivolcs ang pagbuto nga “phreatic o steam-driven”, nga nagpasabot nga ang pagtipon sa alisngaw maoy hinungdan sa pagbuto sa bulkan.
Sa laing bahin, ang mga lokal nga kagamhanan sa kasadpang bahin sa Sugbo, nga nag-atubang sa isla sa Negros, nagpabiling alerto ug niawhag sa mga konstituwente niini nga magpabilin usab nga mabinantayon.
