Gihangop ni Department of National Defense Sec. Gilberto Teodoro Jr. ang bag-ong Defense Attaché sa Brunei Darussalam sa Pilipinas nga si Lt. Col. Suzana Binti Haji Antin sa pasiunang tawag niini sa DND headquarters.
Gikahinumduman ni Sec. Teodoro ang importanteng papel sa Brunei Darussalam sa pagkab-ot sa malungtarong kalinaw ug kauswagan sa Mindanao human sa 2 ka adlaw nga state visit ni Presidente Ferdinand Marcos Jr., sa Brunei niadtong Mayo 28 hangtod 29 sa kasamtangang tuig.
Subay usab sa mga paningkamot nga mamentinar ang kalig-on ug dugang kalamboan sa Bangsamoro Autonomous Region in Muslim Mindanao o kon BARMM, ang kalihim nakig-alayon sa Brunei Darussalam aron mahatagan ug kahigayonan sa edukasyon ang mga Imam sa Armed Forces of the Philippines sa pagpatuman sa mga pagtulon-an sa ang balaang Qur’an, pakigbatok sa radicalization ug mapintas nga ekstremismo sa nasud.
Tungod kay ang bag-ong Brunei defense attaché kay usa ka logistician, ang DND chief mipaambit usab sa Comprehensive Archipelagic Defense Concept (CADC) sa ahensya nga naglatid sa estratehikong inisyatiba sa nasud sa pagbalhin ngadto sa external defense.
Nakita sa kalihim ang kahigayonan sa pagmugna og mga kalambigitan tali sa cyber defense institutions ug defense industries sa PH ug Brunei Darussalam ug aron mapalig-on pa ang interoperability ug total military capacity sa 2 ka mga nasud.
Ang 2 ka mga nasud, nga maoy founding members sa ASEAN, parehong misaad nga magtinabangay ngadto sa pagpalambo sa kalinaw, seguridad ug malinawon nga resolusyon sa mga kalainan sa rehiyon.
Samtang, ang PH ug Brunei gikatakdang magsaulog sa ika-40 nga anibersaryo sa pagkatukod sa diplomatikong relasyon tali sa duha ka nasod karong tuiga.
