Giaprobahan sa US State Department ang posibleng pagbaligya sa mga drones ug missiles sa Taiwan nga gibanabana nga mokantidad og $360 milyon.
Mao kini ang gitaho sa Defense Security Cooperation Agency sa Pentagon.
Diin ang US obligado sa balaod sa paghatag og tabang sa Taiwan aron mapanalipdan ang teritoryo niini bisan pa sa kakuwang sa pormal nga diplomatikong relasyon tali sa duha ka habig.
Ang lakang nahitabo taliwala sa gipahingusgan nga military pressure sa China batok sa Taiwan, lakip ang paglunsad sa mga war games sa palibot sa self-rules island sa milabay nga bulan pagkahuman sa inagurasyon sa bag-ong Presidente sa Taiwan nga si Lai Ching.
Samtang, ang Pentagon miingon nga ang maong pagbaligya sa armas makatabang sa pagpalambo sa seguridad sa Taiwan ug pagmintinar sa politikanhong kalig-on, balanse sa militar ug paglambo sa ekonomiya sa rehiyon.
Lakip sa mga hinagiban nga mahatag sa US ngadto sa Taiwan mao ang Switchblade 300 anti-personnel ug anti-armor loitering munitions ug may kalabutan nga mga ekipo nga nagkantidad ug gibanabana nga $60.2 milyon, ingon man ang ALTIUS 600M-V nga mga drone ug may kalabutan nga kagamitan nga nagkantidad og $300 milyon.
