CENTRAL VISAYAS-Ipahigayon sa Sugbo karong buwan sa Hulyo ang unom ka umaabot nga nasudnong kalihukan nga pangulohan sa Department of Education Central Visayas.
Kini ang gibutyag ni DepEd-7 Regional Director Dr Salustiano Jimenez niadtong Hulyo 5, 2024.
Kini nga mga programa naglakip sa National Festival of Talents, National Schools Press Conference, Palarong Pambansa, National Learning Camp Appreciation Day, National Learner’s Convergence, ug National Launching ug Kick-off sa Brigada Eskwela.
Mahitabo ng National Festival of Talents karong umaabot Hulyo 7 hangtod 11 sa dakbayan sa Naga.
Samtang ang National Schools Press Conference, nga magtigom sa mga campus journalist sa tibuok nasod aron makigtigi sa nagkadaiyang natad ipahigayon karong Hulyo 8 hangtod 12 sa dakbayan sa Carcar.
Gikatakdang magsugod na sa Hulyo 9 ang Palarong Pambansa ug matapos kini sa Hulyo 16.
Nagsugod na niadtong Hulyo 1 ang National Learning Camp (NLC) apan si ang opisyal wala mihatag sa detalye sa venue sa NLC Appreciation Day.
Ang National Learner’s Convergence ipahigayon pud sa umaabot Hulyo 8 hangtod 13 sa dakbayan sa Lapu-Lapu.
Ang National Launching ug Kick-off sa Brigada Eskwela ipahigayon karong Hulyo 17 hangtod 22 sa lungsod sa Carmen, sa amihanang Sugbo, pipila ka adlaw sa dili pa ang pagbukas sa klase karong Hulyo 29 alang sa school year 2024-2025.
Matud ni Jimenez nga ang regional launching ipahigayon sa lungsod sa Liloan.
Malaumon si Jimenez nga daghang regional directors ang motambong sa maong mga kalihukan sanglit tukma sa panahon nga kadaghanan kanila motambong sa Palarong Pambansa.
Ilang gipaabot nga motambong sila si outgoing DepEd Secretary Sara Duterte ug umaabot nga DepEd Secretary Sen. Juan Edgardo “Sonny” Angara sa maong mga nasudnong kalihokan.
