CEBU CITY-Nakahatag ug kabalaka ang kahimtang sa bag-ong gi-renovate nga rubberized track oval sa Cebu City Sports Center (CCSC) sa wala pay opisyal nga pagsugod sa Palarong Pambansa 2024, nunot sa mga gikataho nga mga ‘visible signs’ sa kadaot.
Ang rubberized track oval sa CCSC maoy venue sa pag-host sa pipila ka centerpiece sports sa Palaro sama sa athletics ug track and field events.
Samtang si Cebu City Acting Mayor Raymond Alvin Garcia nipasalig sa publiko nga normal lang ang mga kadaot nga makita sa oval ug dili makaapekto sa pag-host sa dakbayan sa Palarong Pambansa.
Kahinumduman nga ang pag-ayo sa rubberized track oval sa CCSC nag-atubang sa pagsusi sa publiko sa miaging tuig tungod sa dagkong mga paglangay sa pagkompleto sa proyekto.
Gisirad-an ang CCSC alang sa renovation niadtong Mayo 2023 apan bag-o lang nahuman ang proyekto.
Ang maong pagkalangay nakapugos sa nahitabong Central Visayas Regional Athletic Association (CVIRAA) Meet 2024 niadtong buwan sa Mayo sa pagpahigayon og track and field events gawas sa dakbayan sa Sugbo.
