METRO MANILA-Gikatahong pirmahan karong adlawa, Hulyo 8 sa Department of Social Welfare and Development (DSWD) ug sa Social Security System (SSS) ang kasabotan sa low-cost social insurance alang sa mga benepisyaryo sa Pantawid Pamilyang Pilipino Program (4Ps).
Nasayran nga kini nga pakigtambayayong sa SSS arun mopalapad sa social security coverage ngadto sa mga benepisyaryo sa 4Ps, diin maghatag kanila og safety nets gikan sa pagkawala sa kita, sakit, ug uban pang pinansyal nga palas-anon.
Matod ni DSWD Assistant Secretary Irene Dumlao, nga maglakip usab sa mga benepisyaryo sa 4Ps nga miyembro sa asosasyon sa mga mamumuo, mga grupo sa informal sector ug Sustainable Livelihood Program Associations.
Ubos sa kasabotan, ang SSS motabang sa DSWD sa pagparehistro ug pagproseso sa mga aplikasyon sa tanang kwalipikadong benepisyaryo.
Ug ang gipirmahan nga Memorandum of Agreement naglakip usab sa mga tahas ug responsibilidad sa duha ka ahensya sa pagpahigayon og mga seminar ug orientation activities alang sa 4Ps organized groups.
