Gikatahong mas ni-level up ang partnership sa Pilipinas ug Japan human sa pagpirma sa Reciprocal Access Agreement (RAA) sa Palasyo sa Malacañang nga gisaksihan ni Presidente Ferdinand Marcos Jr.
Matod ni Defense Secretary Gilberto Teodoro, ang pagpirma sa RAA usa ka milestone sa gipaambit nga paningkamot aron masiguro ang rules-based international order ug bisan ang kalinaw ug kalig-on sa Indo-Pacific Region.
Dugang ni Teodoro nga gawas sa gipalig-on nga relasyon sa ekonomiya ug pamatigayon, gidugang pa niini ang aspeto sa seguridad aron mapalig-on pa ang bilateral nga relasyon sa duha ka nasud.
Gihatagan usab og gibug-aton ni Teodoro nga ang maong holistic nga dimensyon makadugang sa multilateral nga paningkamot sa duha ka gobyerno aron masiguro nga gorespito ang lagda sa internasyonal nga balaod.
Karon nga napirmahan na ang Reciprocal Access Agreement, gipaabot ang gipakusog nga joint drills ug military exercises tali sa mga sundalong Pilipino ug Hapon.
Mapasalamaton si Sec. Teodoro ngadto sa kagamhanan sa Japan alang sa hinabang nga ilang gihatag sa Pilipinas.
