Padayon ang BRP Suluan (MRRV-4406) sa Philippine Coast Guard(PGC) sa pagpangita sa kanhi gikataho nga nawala nga kapitan sa barko sa Ukraine sukad pa niadtong unang semana sa Hulyo.
Basi sa report sa PCG, katapusang nakit-an ang Ukrainian Captain sa MV Cape Bonavista sa kadagatan nga sakop sa Lubang Islands, Occidental Mindoro niadtong Hulyo 6, 2024.
Ug nasigpatan sa CCTV nga anaa sulod sa maong barko apan, wala na kini makit-an sunod adlaw.
Gipadala sa PCG ang BRP Malapascua aron motabang sa pagpangita ug gigamit sa barko ang thermal scanner camera sa Remote-Controlled Weapon System (RCWS) niini apan wala gihapon makit-i ang kapitan.
Ang PCG nangayo usab og tabang gikan sa Philippine Navy aron magamit ang Littoral Monitoring Station niini.
Samtang ang MV Cape Bonavista gikatahong paingon sa China gikan sa Davao City dihang namatikdan sa mga tripulante niini nga nawala ang langyaw nga kapitan.
