NORTH KOREA-Nagtanyag ang South Korea og humanitarian aid sa North Korea human ang naulahing nasinati sa kaylap nga pagbaha tungod sa pag-ulan.
Diin ang maong pagbaha nakapalubog sa liboan ka mga balay, uban sa mga pananom.
Basi sa pamahayag sa South Korean Unification Ministry, andam kini nga mohatag o magpadala og mga suplay aron matubag ang kasamtangang problema nga giatubang sa NoKor.
Giawhag usab sa nasangpit nga ministro ang Red Cross nga nakabasi sa NoKor nga tubagon ang tanyag niini aron mahibal-an kung unsa nga tabang ang mahimo ipadala sa Habagatan, ug mahibal-an kung giunsa kini ipadala.
Sa pagkakaron, wala pa motubag ang NoKor sa tanyag sa SoKor.
Basi usab sa report sa North Korean state media, ang tubig-baha niabot sa 4,100 ka panimalay, uban sa dili matino nga gidaghanon sa mga pampublikong building, istruktura, dalan, ug bisan ang riles sa nasod.
Gawas niini, giingong dul-an sa tres mil ka ektarya usab nga mga umahan sa maong dapit ang naapektuhan.
Ang lider sa NoKor nga si Kim Jong Un unang nangulo sa emergency meeting aron hisgutan ang maong problema, basi sa mga taho sa state media.
Sa pagkakaron, wala pa’y mga taho sa mga kaswalti sa pagbaha.
