DAVAO CITY-Nisang-at si Davao City 1st District Representative Paolo Duterte og balaudnon nga nagpasiugda sa ‘mandatory random drug test’ matag unom ka buwan alang sa mga pinili ug gitudlo nga opisyal.
Nalatid sa House Bill No. 10744 nga bisan ang presidente sa nasud kinahanglang mopailawom sa random drug testing pinaagi sa hair follicle drug test.
Sa nasangpit nga balaudnon, ang maong random mandatory drug testing magsugod 90 ka adlaw sa dili pa ang eleksyon.
Kun mapamatud-an nga nagpositibo siya sa ilegal nga drugas, kinahanglang suspensuhon dayon siya o tangtangon sa katungdanan.
“Considering the initiatives towards the deterrence of drug use and abuse, exemptions or favors in the mandatory nature of random drug testing shall not extend to certain class privilege such as the elected and appointed officials, since it becomes imperative upon their own mandate that they shall lead the life of modesty and integrity,” pamahayag niini sa iyahan explanatory note.
Kahinumduman nga sa wala pa kini nga balaodnon, ang amahan ni Cong. Paolo nga si kanhi Presidente Rodrigo Duterte personal nga mihagit kang Presidente Ferdinand Marcos, Jr. nga mopailawom sa hair follicle drug test aron pagmatuod nga dili siya adik.
Ang mga komento sa kanhi presidente nagsunod usab sa usa ka video nga nagpakita sa usa ka tawo nga halos parehas kang Marcos nga naggamit og ilegal nga droga — butang nga gikondena sa mga opisyal, gitawag nga deepfake, ug giisip nga tinuyo nga lakang aron paluyahon ang administrasyong Marcos.
