Napagawas na sa Department of Budget and Management (DBM) ang 94.2% sa 2024 national budget sukad sa pagsugod sa Agosto, 2024.
Sumala sa DBM, mikabat sa P5.44 trilyon ang na-release gikan sa P5.77 trilyon nga 2024 budget.
Hinungdan nga aduna nalay P333.57 bilyon ang nahabilin sa kasamtangang pundo.
Anaa sa mga departamento ang moabot sa P3.42 trilyon apil na niini ang ubos sa executive department, kongreso, ug judiciary.
Kadtong gipagawas alang sa special purpose funds (SPFs) mokabat sa P348.95 bilyon o katumbas sa 68.8% sa kinatibuk-ang programmed budget alang sa 2024.
Apil na niini ang budgetary support sa mga korporasyon sa gobyerno, alokasyon sa LGUs, contingent funds, ug uban pa.
Mokabat sa P1.44 trilyon ang sa automatic appropriations o kadtong giprograma kada tuig subay sa balaod. Apil na niini ang national tax allotments, block grants, pension sa mga kanhi presidente ug mga kapikas sa kanhi presidente, ug uban pa.
Karong tuiga ang Pilipinas adunay kinatibuk-ang budget nga P5,767,600,000 nga mas taas og 9.5% kon itandi niadtong 2023.
