Gibutyag sa Presidential Anti-Organized Crime Commission nga ang Singaporean “big boss” nga si Zhang Jie sa Lucky South 99 sa Porac, Pampanga maoy nitabang kang Alice Guo sa pagtago ini sa Batam, Indonesia.
Sa press conference sa buhatan sa National Bureau of Investigation (NBI), ang Department of Justice nagtuo nga sila Alice Guo, Shiela Guo, Cassandra Ong ug uban pang mga akusado nigamit og “backdoor” aron makagawas sa Pilipinas.
Pagkahuman, sa dihang gidakop si Shiela Guo, ang igsuon ni dismissed Bamban, Tarlac Mayor Alice Guo, didto sa Indonesia, duha ka pasaporte ang nakuha dinhi diin usa ka pasaporte sa Pilipinas ug usa ka pasaporte sa China nga ginganlan sunod sa usa ka Zhang Mier.
Matod ni NBI Director Jaime Santiago, ang fingerprints ni Shiela nitakdo sa maong Chinese national.
Mao nga nag-atubang karon si Shiela og kasong deportasyon tungod sa undesirability ug misrepresentation.
Samtang, sumala sa Department of Justice, ang pagkansela sa pasaporte ni Alice Guo ihiklin una aron malikayan ang pipila ka mga problema sa balaod.
Matod ni DOJ Secretary Boying Remulla, makapakomplikado lang kini sa proseso tungod kay sa higayon nga makanselar na ang passport ni Alice Guo mas lisod ang pag-trace ug pagpabalik kaniya sa Pilipinas.
