CEBU CITY-Gipusil-patay ang usa ka gidudahang asset sa kapulisan sa Sitio San Juan, Alaska, Barangay Mambaling, dakbayan sa Sugbo.
Giila ang biktima nga si Dexter Pinili Cuizon, 43-anyos og lumulpyo sa maong dapit.
Si Cuizon nakaangkon og samad pinusilan sa ulo ug ubang bahin sa lawas.
Ang gitumbok nga suspek sa mga kapulisan ay mao si Mark Jedrick Alvarez alyas MJ ug usa ka alyas “balo” giilang mga kanhi-drug convict sa Barangay Duljo Fatima, dakbayan sa Sugbo.
Matod ni Police Major Efren Diaz, ang hepe sa Mambaling Police Station, ang duha ka mga suspek daling niikyas paingon sa seawall sa Duljo Fatima human sa pagpamusil.
Si Diaz midugang nga ang biktima gipusil ni Alvarez tungod kay nagtuo siya nga police asset si Cuizon.
Giilang bag-o lang nagpuyo sa maong dapit sang biktima kay nangita siya og trabaho.
Gihulagway sa kapolisan sa Mambaling nga si Alvarez usa ka hitman sa usa ka drug personality ug responsable sa daghang mga pagpamusil nga nahitabo sa mga lugar nga ilang gisakupan./
Gitumbok usab nga suspek si Alvarez sa pagpusil-patay sa mag-live-in nga magtiayon sa Sitio Micabaja, Barangay Duljo Fatima, dakbayan sa Sugbo, niadtong Agosto 25, 2024.
Sa milabay nga adlaw, gigukod siya sa kapulisan apan nakalikay siya sa maong pagkasikop.
