Gipasiugda ni Justice Undersecretary Raul Vasquez nga kinahanglang tumanon ni Kanhi President Rodrigo Duterte ang freeze order nga unang gipagawas sa korte alang sa mga kabtangan sa Kingdom of Jesus Christ (KOJC).
Matod ni Vazquez, kinsa man ang mobarog isip administrador sa KOJC properties kinahanglang motuman sa maong kamandoan.
Kung kahinumduman nga si Duterte gitudlo kaniadto isip administrador sa mga propyedad ubos sa KOJC, nunot sa hingpit nga pagtago sa founder sa sekta nga si Apollo Quiboloy.
Gitataw ni Vasquez, dili importante bisan og kanhi presidente ang tagdumala sa usa ka pasilidad o propyedad, kinahanglang mosunod siya sa bisan unsa nga mando sa korte.
Sa miaging buwan, ang Court of Appeals (CA) nipagawas og freeze order batok sa napulo ka bank accounts, pito ka real property, lima ka motor vehicles, ug usa ka aircraft sa ngalan ni Quiboloy.
Naglakip usab kini sa 47 ka bank account, 16 ka real property, ug 16 ka motor vehicle ubos sa ngalan sa KOJC ug 17 ka bank accounts, lima ka real property, ug 26 ka motor vehicles ubos sa Swara Sug Media Corporation, nga nag-operate isip media arm niini nga Sonshine Media Network International ( SMNI).
