LAPU-LAPU CITY- Patay ang usa ka 80-anyos nga babaye human nasunog ang balay nga iyahang gipuy-an sa dakbayan sa Lapu-Lapu sa gahapon Lunes, Septiyembre 16, 2024.
Matud pa sa ekslusibong pakighinabi sa Bombo Newsteam kang Pia Bargamento, ang tag-iya sa panimalay nga sa iyahang paglakaw anaa sa sulod ang paralisado nga 80-anyos nga ginang kinsa inahan sa ilang katabang nga si Marlyn Macachor.
Nasuta nga nilakaw si Marlyn ug gibiya-an ang iyahang inahan aron mupalit og pagkaon.
Apan sa pagbalik niini nakugang nalang siya sa dihang gitapuk-an na sa ilang mga silingan maong balay nga nagdilaob na sa kalayo.
Base sa inisyal nga imbestigasyon sa kabumberohan sa dakbayan nga nadawat nila ang taho sa maong sunog alas 2:56 sa hapon og dali nila kining girespondihan.
Gipasaka dayon nila kini sa unang alarma ug pasado alas 3:15 sa hapon sa dihang gideklarar kini nga fire-out.
Mukabat sa kapin P720,000 ang gibana-banang danyos sa maong sunog ug kasamtangang nagpadayon pa ang imbestigasyon sa aksidente sa pagtultul sa hinungdan niini.
Daling mihatag ug hinabang ang kagamhanang dakbayan sa Lapu-Lapu pinaagi sa City Social Welfare and Development Office (CSWDO) ug agakon sa buhatan ang gasto sa haya sa kamatayon sa tiguwang.
