Moabot sa 200 ka mga kaso ang giandam sa Davao Region PNP batok sa giingong mga protector ni Kingdom of Jesus Christ founder Apollo Quiboloy.
Matod ni Davao Police Regional Office (PRO 11) Regional Director Police Brig. Gen. Nicolas Torre III, nga giandam na sa kapolisan ang tanang posibleng kaso batok sa mga dumadapig kang Quiboloy nga maoy usa sa mga hinungdan nga nadugay ang pagpangita sa kontrobersyal nga pastor.
Gimanduan na usab niini ang mga police director ubos sa Davao Region PNP nga magpreparar og 10 ka kaso sa matag indibidwal nga mitabang kang Quiboloy.
Ingon man nga gawas sa mga supporter, pasakaan usab sa kapulisan og kaso ang mga indibidwal nga adunay impormasyon sa nahimutangan ni Quiboloy apan gituyo nga wala mo-cooperate sa PNP ug gituyo nga itago sa PNP ang maong impormasyon.
Lakip sa mga kaso nga ipasaka batok niini mao ang obstruction of justice, disobedience, ug uban pa.
Sa laing bahin, pasakaan usab sa kapolisan og buwag nga sedition charge ang mga sakop sa KOJC nga niapil sa blockade nga nahitabo sa Carlos P. Garcia highway niadtong Agosto 25.
Diin ilang nailhan ang daghang personalidad, lakip ang usa ka retiradong heneral sa kasundalohan.
Matod ni Torre, gamiton sa kapulisan ang mga video ug litrato nga nakuha atol sa kataas sa operasyon sa PNP gamit ang body cameras.
