Gitun-an pag-ayo sa National Security Council ang dokumentaryo sa international media network diin gihisgutan nga si Alice Guo o Guo Hua Ping giingon nga spy sa China.
Matod ni NSC Asst. Director General Jonathan Malaya, ilang i-validate ang gisulti ni She Zhijiang diin mokonsulta usab sila sa ilang partner nga intelligence agencies sa gawas sa nasud aron madugtong ang istorya og mahibaw-an ang tinuod nga pagkatawo ni Alice Guo.
Kahinumduman nga sa bag-ohay lang nga quad comm hearing, gipresentar ni Davao Oriental Representative Cheeno Almario ang docu bahin sa kaso sa miangkon sa kaugalingon nga Chinese spy nga si She Zhijiang, kinsa nitumbok kang Guo Hua Ping nga iyang kaubang Chinese espiya.
Dugang pa ni Malaya nga dili lang sila makatuo sa usa ka taho lamang, ilabi na nga si She Zhijiang nag-atubang usab og mga kaso sa extradition.
Posible nga kini usa lamang ka disinformation nga kampanya sa bahin ni She Zhijiang aron makakuha og atensyon ug simpatiya gikan sa internasyonal nga publiko aron dili siya ma-extradite balik sa China.
Mao nga kinahanglang magmatngon ang NSC sa pagtino kon tinuod ba ang gisulti niini o naglambigit lang sa uban.
Giingong matawag nga sikat ang isyu ni Alice Guo kay bisan ang mga international publication nainteres sa iyang istorya.
