MANDAUE CITY-Mipasaka og kasong kriminal ang Office of the Ombudsman batok kang Dismissed Mandaue City Mayor Jonas Cortes tungod nakakita kini og “probable cause” sa kalapasan sa RA 3019 o Anti-Graft and Corrupt Practices Act.
Kabahin kini sa 13-ka pahina nga resolution sa buhatan pinaagi ni Graft Investigation and Prosecution Officer Leilani Tagulao-Marquez diin nakalikom sila og igong ebidensya arong ikiha si Cortes particular na sa Section 3(E) a RA 3019.
Giduso na kini sa Ombudsman ngadto sa Korte kung asa langkob nga hurisdiksyon si Cortes.
Ang maong resolution sa kasong criminal kay gipagawas niadtong Septyembre 26 sa samang adlaw diin ang Ombudsman miisyu sa desisyon sa kasong administratibo kabahin sa pagtugot sa SUPREA Phils. Dev’t Corp. nga mag-operate nga walay tukmang permits ug naka-angin pa sa kahimsog sa mga lumulupyo sa Barangay Labagon.
Ang kompanyang SUPREA kay usa ka cement-mix company nga nag-operate niadtong tuig 2020 hangtud 2022 sa dakbayan sa Mandaue.
Sa laing bahin, gibasura sa Ombudsman ang laing kasong kriminal, paglapas sa Section 3(F) sa RA 3019, batok kang Cortes, tungod sa “insufficiency of evidence”.
Apan sa habig sa kampo sa gitaktak nga mayor pinaagi sa iyang legal counsel nga si Atty. Jamaal James Calipayan diin matod niya usa lang kini ka maniobra sa kaatbang sa politika ni Cortes sa umaabot 2025 midterm elections.
