Mi-apelar ang Pilipinas sa gobyerno sa Cambodia nga dili ipasaka ang kaso batok sa 13 ka mga Pinay nga gi-recruit isip mga surrogate mothers.
Matod ni Inter-Agency Council Against Trafficking (IACAT) USec. in charge ug Justice USec. Nicholas Ty, nga nihangyo na ang Philippine Embassy sa Cambodia nga dili na ipadayon ang pagpasaka sa kaso.
Dugang niini nga ubos sa balaod sa Pilipinas, biktima sila sa human trafficking.
Ingon man nga dugay pang magpabilin ang 13 ka mabdos nga Pinay sa Cambodia aron mamonitor ang ilang panglawas ug ang ilang mga tiyan.
Gipasalig sa opisyal nga makigbisog ang gobyerno sa mga biktima nga Pinay ug gipaneguro usab niini nga makadawat sila og mga benepisyo gikan sa gobyerno sama sa financial assistance, psycho-social support ug tabang aron makabalik sa katilingban.
Gikumpirmar sa Department of Foreign Affairs nga ang 13 ka mabdos nga mga Pinay ang nalakip sa 20 ka mga Pinay nga na-rescue sa lokal nga awtoridad sa Cambodia.
