PROVINCE OF BOHOL- Patay human gidunggab sa makadaghang higayon ang usa ka 51-anyos nga nurse sa usa ka tambalanan sa dakbayan sa Tagbilaran, probinsya sa Bohol kagahapong adlawa sa Huwebes, Oktubre 17, 2024.
Sa eksklusibong pakighinabi sa Bombo Newsteam kang Police Lt. Col. John Kareen Escober, ang Hepe sa Tagbilaran City Police Station, gisaysay niini nga nahitabo ang maong insidente pasado alas 9:45 sa buntag sulod medical ward sa Bohol Doctors Hospital sa Barangay Bool sa naasoy nga dakbayan.
Giila niini ang suspek nga si Marlito Linguis, 31-anyos, ulitawo ug lumulupyo sa Purok 4, barangay Magsaysay sa lungsod sa Sevilla sa probinsya sa Bohol.
Samtang ang biktima giila lang usa nga si alyas “Marie”, 51-anyos ug lumulupyo sa Barangay Dao, dakbayan sa Tagbilaran kinsa nakaangkon ug daghang dinunggaban sa dughan ug sa liog hinungdan sa kamatayon niini.
Dugang pa, nga ng laing naangol sa insidente ang usa ka utility worker sa maong tambalanan nga giilang si Francis Justiniare, 21-anyos ug lumulupyo sa Purok 4, Barangay Cainsican, lungsod sa Inabangan nga nakaangkon ug samad-dinunggaban sa tiyan nga swerteng naluwas sa pagpangatake.
Basi sa dagan sa ilahang imbistigasyon, naadmit ang suspek niadtong adlaw sa Lunes, Oktubre 14 tungod sa gipamati niini nga diarrhea o pagpanakit sa tiyan og padulong na ma-discharge, apan sa higayon nibayad ang kauban niini didto na kini naghasi sa nurse ug dayon sa utility worker sa maong dapit.
Dugang pa ni Lt. Col. Escober nga sa pakighinabi niini sa suspek isip parte sa proseso sa imbestigasyon nga matod niini nga adunay nabuhian nga istorya ang nurse nga wala kini nakauyon, apan wala gidetalye sa suspek kung unsa kini.
Nasuta nga drug surrenderer si Marlito niadtong tuig 2016 atol sa halapad nga Oplan Tokhang sa nasudnong kapulisan niadtong panahona.
Subay niini nga nakuha sa suspek ang murder weapon nga medical scissors sa nurses station.
Kasong Murder ug Physical Injury ang giandam sa Tagbilaran City Police batok sa suspek.
