MANDAUE CITY-Dili mominos sa 300 ka mga personahe gikan sa mga nagkadaiyang ahensya sa kagamhanang dakbayan sa Mandaue ang ipakatap isip pag-obserbar sa kalag-kalag karong umaabot Nobyembre 1 (All Saints’ Day) ug 2 (All Souls’ Day).
Ipakatap kini sa walo (8) ka mga sementeryohan sa dakbayan sa Mandaue diin sugod niadtong Oktubre 17 nagsugod nang pag-inspeksyon kini.
Pipila sa ilang nasuta nga mga balda sa mubisita kay mao ang mga gibabagan nga mga agianan ug kaniob sa dapit nga mao ang pagasulbaron mato pa ni Felix Suico Jr., ang pangu sa Operations and Warning sa Mandaue City Disaster Risk Reduction and Management Office (CDRRMO).
Sa umaabot Oktubre 31, mudeploy ang CDRRMO ug 43 ka mga personahe matag sementeryo nga ubanan sa mga auxiliary forces gikan sa Mandaue City Police Office, Bureau of Fire Protection, opisyales sa barangay ug mga market authorities sa pagdasok sa mga bisita hangtud Nobyembre 3, 2024.
Ang mga lakang sa kaluwasan naglakip sa pagpatuman sa crowd control, first aid response, roving medical teams ug estratehikong gibutang nga emergency vehicles.
Dugang ni Suico nga mag-implementar kini ug hugot sa restrictions sa mga butang-butang sama sa ilimnong makahubog, hait nga mga butang, ug flammable nga mga materyal.
Ang mga sementeryo nga sakop mao ang St. Joseph’s Parish Roman Catholic Cemetery, ang Municipal Cemetery, Manpark Cemetery ug Grosmar Memorial Garden sa Barangay Guizo, mga pampublikong sementeryo sa Barangay Pagsabungan ug Jagobiao, Angelicum Garden of Angels sa Barangay Canduman ug Cebu Memorial Park, nga nahimutang sa Barangay Banilad sa dakbayan sa Sugbo ug Mandaue.
Miawhag ang opisyal sa publiko sa pagplano sa mas sayo-sayo nga panahon sa pagbisita sa sementeryo awon sa paglikay sa kahuot sa panahon.
