CEBU CITY- Gikatakda nga mobalik na sa Cebu City Sports Center (CCSC) o ang karaang Abellana Sports Complex ang Sinulog sa Sugbo sa umaabot tuig 2025.
Kini ang gi-anunsyo ni Cebu City Mayor Raymond Alvin Garcia kagahapong adlawa, Lunes Oktubre 21, 2024.
Magdala kini sa tema nga “Sinulog sa Sugbo 2025: One Beat, One Dance, One Vision” diin naghinumdum sa karaang tema niini sa nakalabayng katuigan sa wala pa mabalhin sa South Road Properties (SRP) niadtong tuig 2023 ug 2024.
Subay niini nga kalamboan, ang kagamhanag dakbayan sa Sugbo mugahin sa kapin P105-milyones nga pondo sa pag-organisar sa Sinulog sa umaabot Enero 2025.
Ingon man nga gipapas usab ni Mayor Garcia ang registration fee sa pipila ka kategorya sa puppeteer’s ug sa higantes aron sa pag-promote sa artistikong pagkamamugnaon sa musalmot sa tinuig nga kapistahan sa dakbayan.
Ang papremyo usab sa puppeteers ug higantes nga katergorya kay anaa na sa P100,000 sa 1st Prize; P75,000 sa 2nd Prize; ug P50,000 sa 3rd Prize nga mas taas kun itandi sa mga nakalabay nga kalihukan.
Gipadak-an usab sa kagamhanang dakbayan ang subsidy sa mga musalmot nga mga contingents nga anaa na sa P1.5-milyones sa out-of-town contingents; P1-milyones sa Cebu City contingents ug Cebu Province contingents.
Dugang niini nga matod sa Mayor nga anaa na sa 17 ka mga contigents ang mikumpirmar sa ilang pagsalmot sa umaabot Sinulog sa Sugbo 2025.
