Gituohan sa Quad Committee nga mas paspas ang pag-uswag sa imbestigasyon kalabot sa giingong extrajudicial killings ubos sa administrasyong Duterte kung maghiusa ang Kamara ug Senado.
Matod ni Quad Comm overall chairman Robert Ace Barbers, ilang isugyot nila ni Speaker Martin Romualdez ug Senate President Chiz Escudero nga adunay joint committee hearing aron mahiusa ang imbestigasyon sa EJK.
Niining paagiha, kay giingong mas lapad, komprehensibo ug intelihente ang mga pangutana sa mga magbabalaod ug masiguro nga patas ang imbestigasyon.
Gipasabot ni Barbers, susama kini sa joint session sa President’s State of the Nation Address o bicameral conference committee.
Matod pa nga lapad nga isyu ang EJK nga importanteng hisgutan, busa panahon na nga magtigom ug maghimo og solusyon pinaagi sa bag-ong balaod nga mopahunong sa pagpamatay.
Sa laing bahin, suportado ni Barbers ang pagpahigayon og parallel investigation sa Senado ug nanghinaot sila nga magkatakdo ang imbestigasyon sa duha ka kamara sa maong isyu.
