LAPU-LAPU CITY,CEBU- Nasakmit sa mga sakop sa National Bureau of Investigation-Cebu District Office (NBI-CEBDO) ang lain pito-ka mga vaults ug mga dokumento sa patigayon (business documents) sa pagronda pagbalik niini sa opisina sa Chinese national “Shouqi Zhao” sa Tourist Garden Hotel, Barangay Agus, dakbayan sa Lapu-lapu nga nahitabo sa Miyerkules, Oktubre 23, 2024.
Kini subay sa nakuha nga search warrant sa NBI-CEBDO nga nagtumong partikular sa opisina ni Zhao kinsa presidente sa maong hotel, nga narondahan sa mga awtoridad lakip na ang NBI ug Presidential Anti-Organized Crime Commission (PAOCC) niadtong Agosto 31, 2024.
Kung diin,kapin 169 ka mga langyaw nga nag-operate sa illegal nga POGO ang na-rescue.
Dugang pa, nga si Zhao usab ang presidente sa Lapu-Lapu Chinese Guild kinsa nakuhaan og record nga midonar og computers ug internet access sa kagamhanang dakbayan sa Lapu-Lapu nga gidawat ni Mayor Junard “Ahong” Chan niadtong tuig 2019.
Matod pa ni NBI-CEBDO Agent-in-Charge Arnel Pura, nga nasakmit nila ang mga kagamitan nga importanteng lakang sa ilang imbestigasyon nga mao ang 1-ka mga vaults ug mga dokumento sa patigayon sama sa utility bills, income tax returns, ug immigration papers.
Ang gihuptang search warrant sa mga awtoridad kay aprobado sa korte sa maong hurisdiksyon niadtong Martes, Oktubre 22.
Nagtumong kini sa dugang kasayuran sa mga narekober nga mga dokumento kabahin sa pagpahamtang og kaso sa 169 ka mga langyaw lakip na ang usa ka Pilipino nga si Zandrew Cantarona.
Kasamtangang gitanggong sa PAOCC headquartes sa Pasay City ang 169 ka mga langyaw nga gilangkuban sa Chinese, Indonesian ug Burmese nationals.
